9.52.2

प्रवेशयेद् गुदं ध्वस्तम् अभ्यक्तं स्वेदितं मृदु

praveśayed gudaṃ dhvastam abhyaktaṃ sveditaṃ mṛdu

9.53

कुर्याच्च गोफणाबन्धं मध्यच्छिद्रेण चर्मणा

kuryācca gophaṇābandhaṃ madhyacchidreṇa carmaṇā

9.53.2

पञ्चमूलस्य महतः क्वाथं क्षीरे विपाचयेत्

pañcamūlasya mahataḥ kvāthaṃ kṣīre vipācayet

9.54

उन्दुरुं चान्त्ररहितं तेन वातघ्नकल्कवत्

unduruṃ cāntrarahitaṃ tena vātaghnakalkavat

9.54.2

तैलं पचेद् गुदभ्रंशं पानाभ्यङ्गेन तज् जयेत्

tailaṃ paced gudabhraṃśaṃ pānābhyaṅgena taj jayet

9.55

पैत्ते तु सामे तीक्ष्णोष्णवर्ज्यं प्राग् इव लङ्घनम्

paitte tu sāme tīkṣṇoṣṇavarjyaṃ prāg iva laṅghanam

9.55.2

तृड्वान् पिबेत् षडङ्गाम्बु सभूनिम्बं सशारिवम्

tṛḍvān pibet ṣaḍaṅgāmbu sabhūnimbaṃ saśārivam

9.56

पेयादि क्षुधितस्यान्नम् अग्निसंधुक्षणं हितम्

peyādi kṣudhitasyānnam agnisaṃdhukṣaṇaṃ hitam

9.56.2

बृहत्यादिगणाभीरुद्विबलाशूर्पपर्णिभिः

bṛhatyādigaṇābhīrudvibalāśūrpaparṇibhiḥ

9.57

पाययेद् अनुबन्धे तु सक्षौद्रं तण्डुलाम्भसा

pāyayed anubandhe tu sakṣaudraṃ taṇḍulāmbhasā

9.57.2

कुटजस्य फलं पिष्टं सवल्कं सघुणप्रियम्

kuṭajasya phalaṃ piṣṭaṃ savalkaṃ saghuṇapriyam

9.58

पाठावत्सकबीजत्वग्दार्वीग्रन्थिकशुण्ठि वा

pāṭhāvatsakabījatvagdārvīgranthikaśuṇṭhi vā

9.58.2

क्वाथं वातिविषाबिल्ववत्सकोदीच्यमुस्तजम्

kvāthaṃ vātiviṣābilvavatsakodīcyamustajam

9.59

अथवातिविषामूर्वानिशेन्द्रयवतार्क्ष्यजम्

athavātiviṣāmūrvāniśendrayavatārkṣyajam

9.59.2

समध्वतिविषाशुण्ठीमुस्तेन्द्रयवकट्फलम्

samadhvativiṣāśuṇṭhīmustendrayavakaṭphalam

9.60

पलं वत्सकबीजस्य श्रपयित्वा रसं पिबेत्

palaṃ vatsakabījasya śrapayitvā rasaṃ pibet

9.60.2

यो रसाशी जयेच्छीघ्रं स पैत्तं जठरामयम्

yo rasāśī jayecchīghraṃ sa paittaṃ jaṭharāmayam

9.61

मुस्ताकषायम् एवं वा पिबेन् मधुसमायुतम्

mustākaṣāyam evaṃ vā piben madhusamāyutam

9.61.2

सक्षौद्रं शाल्मलीवृन्तकषायं वा हिमाह्वयम्

sakṣaudraṃ śālmalīvṛntakaṣāyaṃ vā himāhvayam

9.62

किराततिक्तकं मुस्तं वत्सकं सरसाञ्जनम्

kirātatiktakaṃ mustaṃ vatsakaṃ sarasāñjanam

Aṣṭāṅgahṛdayasaṃhitā