15.2.2

मासं द्वौ वाथवा गव्यं मूत्रं माहिषम् एव वा

māsaṃ dvau vāthavā gavyaṃ mūtraṃ māhiṣam eva vā

15.3

पिबेद् गोक्षीरभुक् स्याद् वा करभीक्षीरवर्तनः

pibed gokṣīrabhuk syād vā karabhīkṣīravartanaḥ

15.3.2

दाहानाहातितृण्मूर्छापरीतस् तु विशेषतः

dāhānāhātitṛṇmūrchāparītas tu viśeṣataḥ

15.4

रूक्षाणां बहुवातानां दोषसंशुद्धिकाङ्क्षिणाम्

rūkṣāṇāṃ bahuvātānāṃ doṣasaṃśuddhikāṅkṣiṇām

15.4.2

स्नेहनीयानि सर्पींषि जठरघ्नानि योजयेत्

snehanīyāni sarpīṃṣi jaṭharaghnāni yojayet

15.5

षट्पलं दशमूलाम्बुमस्तुद्व्याढकसाधितम्

ṣaṭpalaṃ daśamūlāmbumastudvyāḍhakasādhitam

15.5.2

नागरत्रिपलं प्रस्थं घृततैलात् तथाढकम्

nāgaratripalaṃ prasthaṃ ghṛtatailāt tathāḍhakam

15.6

मस्तुनः साधयित्वैतत् पिबेत् सर्वोदरापहम्

mastunaḥ sādhayitvaitat pibet sarvodarāpaham

15.6.2

कफमारुतसम्भूते गुल्मे च परमं हितम्

kaphamārutasambhūte gulme ca paramaṃ hitam

15.7

चतुर्गुणे जले मूत्रे द्विगुणे चित्रकात् पले

caturguṇe jale mūtre dviguṇe citrakāt pale

15.7.2

कल्के सिद्धं घृतप्रस्थं सक्षारं जठरी पिबेत्

kalke siddhaṃ ghṛtaprasthaṃ sakṣāraṃ jaṭharī pibet

15.8

यवकोलकुलत्थानां पञ्चमूलस्य चाम्भसा

yavakolakulatthānāṃ pañcamūlasya cāmbhasā

15.8.2

सुरासौवीरकाभ्यां च सिद्धं वा पाययेद् घृतम्

surāsauvīrakābhyāṃ ca siddhaṃ vā pāyayed ghṛtam

15.9

एभिः स्निग्धाय संजाते बले शान्ते च मारुते

ebhiḥ snigdhāya saṃjāte bale śānte ca mārute

15.9.2

स्रस्ते दोषाशये दद्यात् कल्पदृष्टं विरेचनम्

sraste doṣāśaye dadyāt kalpadṛṣṭaṃ virecanam

15.10

पटोलमूलं त्रिफलां निशां वेल्लं च कार्षिकम्

paṭolamūlaṃ triphalāṃ niśāṃ vellaṃ ca kārṣikam

15.10.2

कम्पिल्लनीलिनीकुम्भभागान् द्वित्रिचतुर्गुणान्

kampillanīlinīkumbhabhāgān dvitricaturguṇān

15.11

पिबेत् संचूर्ण्य मूत्रेण पेयापूर्वं ततो रसैः

pibet saṃcūrṇya mūtreṇa peyāpūrvaṃ tato rasaiḥ

15.11.2

विरिक्तो जाङ्गलैरद्यात् ततः षड्दिवसं पयः

virikto jāṅgalairadyāt tataḥ ṣaḍdivasaṃ payaḥ

15.12

शृतं पिबेद् व्योषयुतं पीतम् एवं पुनः पुनः

śṛtaṃ pibed vyoṣayutaṃ pītam evaṃ punaḥ punaḥ

Aṣṭāṅgahṛdayasaṃhitā