2.3.2

पित्ताद् उष्णाम्लकटुकं पीतराज्यप्सु दाहकृत्

pittād uṣṇāmlakaṭukaṃ pītarājyapsu dāhakṛt

2.4

कफात् सलवणं सान्द्रं जले मज्जति पिच्छिलम्

kaphāt salavaṇaṃ sāndraṃ jale majjati picchilam

2.4.2

संसृष्टलिङ्गं संसर्गात् त्रिलिङ्गं सांनिपातिकम्

saṃsṛṣṭaliṅgaṃ saṃsargāt triliṅgaṃ sāṃnipātikam

2.5

यथास्वलिङ्गांस्तद् व्याधीन् जनयत्युपयोजितम्

yathāsvaliṅgāṃstad vyādhīn janayatyupayojitam

2.5.2

शिशोस् तीक्ष्णम् अभीक्ष्णं च रोदनाल्लक्षयेद् रुजम्

śiśos tīkṣṇam abhīkṣṇaṃ ca rodanāllakṣayed rujam

2.6

स यं स्पृशेद् भृशं देशं यत्र च स्पर्शनाक्षमः

sa yaṃ spṛśed bhṛśaṃ deśaṃ yatra ca sparśanākṣamaḥ

2.6.2

तत्र विद्याद् रुजं मूर्ध्नि रुजं चाक्षिनिमीलनात्

tatra vidyād rujaṃ mūrdhni rujaṃ cākṣinimīlanāt

2.7

हृदि जिह्वौष्ठदशनश्वासमुष्टिनिपीडनैः

hṛdi jihvauṣṭhadaśanaśvāsamuṣṭinipīḍanaiḥ

2.7.2

कोष्ठे विबन्धवमथुस्तनदंशान्त्रकूजनैः

koṣṭhe vibandhavamathustanadaṃśāntrakūjanaiḥ

2.8

आध्मानपृष्ठनमनजठरोन्नमनैरपि

ādhmānapṛṣṭhanamanajaṭharonnamanairapi

2.8.2

वस्तौ गुह्ये च विण्मूत्रसङ्गोत्त्रासदिगीक्षणैः

vastau guhye ca viṇmūtrasaṅgottrāsadigīkṣaṇaiḥ

2.9

अथ धात्र्याः क्रियां कुर्याद् यथादोषं यथामयम्

atha dhātryāḥ kriyāṃ kuryād yathādoṣaṃ yathāmayam

2.9.2

तत्र वातात्मके स्तन्ये दशमूलं त्र्यहं पिबेत्

tatra vātātmake stanye daśamūlaṃ tryahaṃ pibet

2.10

अथवाग्निवचापाठाकटुकाकुष्ठदीप्यकम्

athavāgnivacāpāṭhākaṭukākuṣṭhadīpyakam

2.10.2

सभार्गीदारुसरलवृश्चिकालीकणोषणम्

sabhārgīdārusaralavṛścikālīkaṇoṣaṇam

2.11

ततः पिबेद् अन्यतमं वातव्याधिहरं घृतम्

tataḥ pibed anyatamaṃ vātavyādhiharaṃ ghṛtam

2.11.2

अनु चाच्छसुराम् एवं स्निग्धां मृदु विरेचयेत्

anu cācchasurām evaṃ snigdhāṃ mṛdu virecayet

2.12

वस्तिकर्म ततः कुर्यात् स्वेदादींश्चानिलापहान्

vastikarma tataḥ kuryāt svedādīṃścānilāpahān

2.12.2

रास्नाजमोदासरलदेवदारुरजोऽन्वितम्

rāsnājamodāsaraladevadārurajo'nvitam

2.13

बालो लिह्याद् घृतं तैर् वा विपक्वं ससितोपलम्

bālo lihyād ghṛtaṃ tair vā vipakvaṃ sasitopalam

Aṣṭāṅgahṛdayasaṃhitā