7.1.3

स्मृत्यपायो ह्यपस्मारः स धीसत्त्वाभिसम्प्लवात्

smṛtyapāyo hyapasmāraḥ sa dhīsattvābhisamplavāt

7.1.4

जायते ऽभिहते चित्ते चिन्ताशोकभयादिभिः

jāyate 'bhihate citte cintāśokabhayādibhiḥ

7.2

उन्मादवत् प्रकुपितैश्चित्तदेहगतैर् मलैः

unmādavat prakupitaiścittadehagatair malaiḥ

7.2.2

हते सत्त्वे हृदि व्याप्ते संज्ञावाहिषु खेषु च

hate sattve hṛdi vyāpte saṃjñāvāhiṣu kheṣu ca

7.3

तमो विशन् मूढमतिर् बीभत्साः कुरुते क्रियाः

tamo viśan mūḍhamatir bībhatsāḥ kurute kriyāḥ

7.3.2

दन्तान् खादन् वमन् फेनं हस्तौ पादौ च विक्षिपन्

dantān khādan vaman phenaṃ hastau pādau ca vikṣipan

7.4

पश्यन्न् असन्ति रूपाणि प्रस्खलन् पतति क्षितौ

paśyann asanti rūpāṇi praskhalan patati kṣitau

7.4.2

विजिह्माक्षिभ्रुवो दोषवेगे ऽतीते विबुध्यते

vijihmākṣibhruvo doṣavege 'tīte vibudhyate

7.5

कालान्तरेण स पुनश्चैवम् एव विचेष्टते

kālāntareṇa sa punaścaivam eva viceṣṭate

7.5.2

अपस्मारश्चतुर्भेदो वाताद्यैर् निचयेन च

apasmāraścaturbhedo vātādyair nicayena ca

7.6

रूपम् उत्पत्स्यमाने ऽस्मिन् हृत्कम्पः शून्यता भ्रमः

rūpam utpatsyamāne 'smin hṛtkampaḥ śūnyatā bhramaḥ

7.6.2

तमसो दर्शनं ध्यानं भ्रूव्युदासो ऽक्षिवैकृतम्

tamaso darśanaṃ dhyānaṃ bhrūvyudāso 'kṣivaikṛtam

7.7

अशब्दश्रवणं स्वेदो लालासिङ्घाणकस्रुतिः

aśabdaśravaṇaṃ svedo lālāsiṅghāṇakasrutiḥ

7.7.2

अविपाको ऽरुचिर् मूर्छा कुक्ष्याटोपो बलक्षयः

avipāko 'rucir mūrchā kukṣyāṭopo balakṣayaḥ

7.8

निद्रानाशो ऽङ्गमर्दस् तृट् स्वप्ने गानं सनर्तनम्

nidrānāśo 'ṅgamardas tṛṭ svapne gānaṃ sanartanam

7.8.2

पानं तैलस्य मद्यस्य तयोरेव च मेहनम्

pānaṃ tailasya madyasya tayoreva ca mehanam

7.9

तत्र वातात् स्फुरत्सक्थिः प्रपतंश्च मुहुर् मुहुः

tatra vātāt sphuratsakthiḥ prapataṃśca muhur muhuḥ

7.9.2

अपस्मरति संज्ञां च लभते विस्वरं रुदन्

apasmarati saṃjñāṃ ca labhate visvaraṃ rudan

7.10

उत्पिण्डिताक्षः श्वसिति फेनं वमति कम्पते

utpiṇḍitākṣaḥ śvasiti phenaṃ vamati kampate

7.10.2

आविध्यति शिरो दन्तान् दशत्याध्मातकन्धरः

āvidhyati śiro dantān daśatyādhmātakandharaḥ

Aṣṭāṅgahṛdayasaṃhitā