9.14.2

केवलेनापि वा सेकं मस्तुना जाङ्गलाशिनः

kevalenāpi vā sekaṃ mastunā jāṅgalāśinaḥ

9.15

पिटिका व्रीहिवक्त्रेण भित्त्वा तु कठिनोन्नताः

piṭikā vrīhivaktreṇa bhittvā tu kaṭhinonnatāḥ

9.15.2

निष्पीडयेद् अनु विधिः परिशेषस् तु पूर्ववत्

niṣpīḍayed anu vidhiḥ pariśeṣas tu pūrvavat

9.16

लेखने भेदने चायं क्रमः सर्वत्र वर्त्मनि

lekhane bhedane cāyaṃ kramaḥ sarvatra vartmani

9.16.2

पित्तास्रोत्क्लिष्टयोः स्वादुस्कन्धसिद्धेन सर्पिषा

pittāsrotkliṣṭayoḥ svāduskandhasiddhena sarpiṣā

9.17

सिराविमोक्षः स्निग्धस्य त्रिवृच्छ्रेष्ठं विरेचनम्

sirāvimokṣaḥ snigdhasya trivṛcchreṣṭhaṃ virecanam

9.17.2

लिखिते स्रुतरक्ते च वर्त्मनि क्षालनं हितम्

likhite srutarakte ca vartmani kṣālanaṃ hitam

9.18

यष्टीकषायः सेकस् तु क्षीरं चन्दनसाधितम्

yaṣṭīkaṣāyaḥ sekas tu kṣīraṃ candanasādhitam

9.18.2

पक्ष्मणां सदने सूच्या रोमकूपान् विकुट्टयेत्

pakṣmaṇāṃ sadane sūcyā romakūpān vikuṭṭayet

9.19

ग्राहयेद् वा जलौकोभिः पयसेक्षुरसेन वा

grāhayed vā jalaukobhiḥ payasekṣurasena vā

9.19.2

वमनं नावनं सर्पिः शृतं मधुरशीतलैः

vamanaṃ nāvanaṃ sarpiḥ śṛtaṃ madhuraśītalaiḥ

9.20

संचूर्ण्य पुष्पकासीसं भावयेत् सुरसारसैः

saṃcūrṇya puṣpakāsīsaṃ bhāvayet surasārasaiḥ

9.20.2

ताम्रे दशाहं परमं पक्ष्मशाते तद् अञ्जनम्

tāmre daśāhaṃ paramaṃ pakṣmaśāte tad añjanam

9.21

पोथकीर् लिखिताः शुण्ठीसैन्धवप्रतिसारिताः

pothakīr likhitāḥ śuṇṭhīsaindhavapratisāritāḥ

9.21.2

उष्णाम्बुक्षालिताः सिञ्चेत् खदिराढकिशिग्रुभिः

uṣṇāmbukṣālitāḥ siñcet khadirāḍhakiśigrubhiḥ

9.22

अप्सिद्धैर् द्विनिशाश्रेष्ठामधुकैर् वा समाक्षिकैः

apsiddhair dviniśāśreṣṭhāmadhukair vā samākṣikaiḥ

9.22.2

कफोत्क्लिष्टे विलिखिते सक्षौद्रैः प्रतिसारणम्

kaphotkliṣṭe vilikhite sakṣaudraiḥ pratisāraṇam

9.23

सूक्ष्मैः सैन्धवकासीसमनोह्वाकणतार्क्ष्यजैः

sūkṣmaiḥ saindhavakāsīsamanohvākaṇatārkṣyajaiḥ

9.23.2

वमनाञ्जननस्यादि सर्वं च कफजिद्धितम्

vamanāñjananasyādi sarvaṃ ca kaphajiddhitam

9.24

कर्तव्यं लगणे ऽप्येतद् अशान्तावग्निना दहेत्

kartavyaṃ lagaṇe 'pyetad aśāntāvagninā dahet

Aṣṭāṅgahṛdayasaṃhitā