11.1

अथातः सन्धिसितासितरोगप्रतिषेधं व्याख्यास्यामः

athātaḥ sandhisitāsitarogapratiṣedhaṃ vyākhyāsyāmaḥ

11.1.2

इति ह स्माहुर् आत्रेयादयो महर्षयः

iti ha smāhur ātreyādayo maharṣayaḥ

11.1.3

उपनाहं भिषक् स्विन्नं भिन्नं व्रीहिमुखेन च

upanāhaṃ bhiṣak svinnaṃ bhinnaṃ vrīhimukhena ca

11.1.4

लेखयेन्मण्डलाग्रेण ततश्च प्रतिसारयेत्

lekhayenmaṇḍalāgreṇa tataśca pratisārayet

11.2

पिप्पलीक्षौद्रसिन्धूत्थैर् बध्नीयात् पूर्ववत् ततः

pippalīkṣaudrasindhūtthair badhnīyāt pūrvavat tataḥ

11.2.2

पटोलपत्त्रामलकक्वाथेनाश्चोतयेच्च तम्

paṭolapattrāmalakakvāthenāścotayecca tam

11.3

पर्वणी बडिशेनात्ता बाह्यसंधित्रिभागतः

parvaṇī baḍiśenāttā bāhyasaṃdhitribhāgataḥ

11.3.2

वृद्धिपत्त्रेण वर्ध्यार्धे स्याद् अश्रुगतिरन्यथा

vṛddhipattreṇa vardhyārdhe syād aśrugatiranyathā

11.4

चिकित्सा चार्मवत् क्षौद्रसैन्धवप्रतिसारिता

cikitsā cārmavat kṣaudrasaindhavapratisāritā

11.4.2

पूयालसे सिरां विध्येत् ततस् तम् उपनाहयेत्

pūyālase sirāṃ vidhyet tatas tam upanāhayet

11.5

कुर्वीत चाक्षिपाकोक्तं सर्वं कर्म यथाविधि

kurvīta cākṣipākoktaṃ sarvaṃ karma yathāvidhi

11.5.2

सैन्धवार्द्रककासीसलोहताम्रैः सुचूर्णितैः

saindhavārdrakakāsīsalohatāmraiḥ sucūrṇitaiḥ

11.6

चूर्णाञ्जनं प्रयुञ्जीत सक्षौद्रैर् वा रसक्रियाम्

cūrṇāñjanaṃ prayuñjīta sakṣaudrair vā rasakriyām

11.6.2

कृमिग्रन्थिं करीषेण स्विन्नं भित्त्वा विलिख्य च

kṛmigranthiṃ karīṣeṇa svinnaṃ bhittvā vilikhya ca

11.7

त्रिफलाक्षौद्रकासीससैन्धवैः प्रतिसारयेत्

triphalākṣaudrakāsīsasaindhavaiḥ pratisārayet

11.7.2

पित्ताभिष्यन्दवच्छुक्तिं बलासाह्वयपिष्टके

pittābhiṣyandavacchuktiṃ balāsāhvayapiṣṭake

11.8

कफाभिष्यन्दवन् मुक्त्वा सिराव्यधम् उपाचरेत्

kaphābhiṣyandavan muktvā sirāvyadham upācaret

11.8.2

बीजपूररसाक्तं च व्योषकट्फलम् अञ्जनम्

bījapūrarasāktaṃ ca vyoṣakaṭphalam añjanam

11.9

जातीमुकुलसिन्धूत्थदेवदारुमहौषधैः

jātīmukulasindhūtthadevadārumahauṣadhaiḥ

11.9.2

पिष्टैः प्रसन्नया वर्तिः शोफकण्डूघ्नम् अञ्जनम्

piṣṭaiḥ prasannayā vartiḥ śophakaṇḍūghnam añjanam

Aṣṭāṅgahṛdayasaṃhitā