1.42.2

विद्याद्विदारिगन्धाद्यं श्वदंष्ट्रापञ्चमं गणम्

vidyādvidārigandhādyaṃ śvadaṃṣṭrāpañcamaṃ gaṇam

1.43

बिल्वाग्निमन्थश्योनाकं काश्मर्यमथ पाटलाम्

bilvāgnimanthaśyonākaṃ kāśmaryamatha pāṭalām

1.43.2

पुनर्नवां शूर्पपर्ण्यौ बलाम् एरण्डमेव च

punarnavāṃ śūrpaparṇyau balām eraṇḍameva ca

1.44

जीवकर्षभकौ मेदां जीवन्तीं सशतावरीम्

jīvakarṣabhakau medāṃ jīvantīṃ saśatāvarīm

1.44.2

शरेक्षुदर्भकाशानां शालीनां मूलमेव च

śarekṣudarbhakāśānāṃ śālīnāṃ mūlameva ca

1.45

इत्येषां पञ्चमूलानां पञ्चानामुपकल्पयेत्

ityeṣāṃ pañcamūlānāṃ pañcānāmupakalpayet

1.45.2

भागान् यथोक्तांस्तत्सर्वं साध्यं दशगुणे ऽम्भसि

bhāgān yathoktāṃstatsarvaṃ sādhyaṃ daśaguṇe 'mbhasi

1.46

दशभागावशेषं तु पूतं तं ग्राहयेद्रसम्

daśabhāgāvaśeṣaṃ tu pūtaṃ taṃ grāhayedrasam

1.46.2

हरीतकीश्च ताः सर्वाः सर्वाण्यामलकानि च

harītakīśca tāḥ sarvāḥ sarvāṇyāmalakāni ca

1.47

तानि सर्वाण्यनस्थीनि फलान्यापोथ्य कूर्चनैः

tāni sarvāṇyanasthīni phalānyāpothya kūrcanaiḥ

1.47.2

विनीय तस्मिन्निर्यूहे चूर्णानीमानि दापयेत्

vinīya tasminniryūhe cūrṇānīmāni dāpayet

1.48

मण्डूकपर्ण्याः पिप्पल्याः शङ्खपुष्प्याः प्लवस्य च

maṇḍūkaparṇyāḥ pippalyāḥ śaṅkhapuṣpyāḥ plavasya ca

1.48.2

मुस्तानां सविडङ्गानां चन्दनागुरुणोस्तथा

mustānāṃ saviḍaṅgānāṃ candanāguruṇostathā

1.49

मधुकस्य हरिद्राया वचायाः कनकस्य च

madhukasya haridrāyā vacāyāḥ kanakasya ca

1.49.2

भागांश् चतुष्पलान् कृत्वा सूक्ष्मैलायास् त्वचस् तथा

bhāgāṃś catuṣpalān kṛtvā sūkṣmailāyās tvacas tathā

1.50

सितोपलासहस्रं च चूर्णितं तुलयाधिकम्

sitopalāsahasraṃ ca cūrṇitaṃ tulayādhikam

1.50.2

तैलस्य ह्य् आढकं तत्र दद्यात् त्रीणि च सर्पिषः

tailasya hy āḍhakaṃ tatra dadyāt trīṇi ca sarpiṣaḥ

1.51

साध्यमौदुम्बरे पात्रे तत् सर्वं मृदुनाग्निना

sādhyamaudumbare pātre tat sarvaṃ mṛdunāgninā

1.51.2

ज्ञात्वा लेह्यमदग्धं च शीतं क्षौद्रेण संसृजेत्

jñātvā lehyamadagdhaṃ ca śītaṃ kṣaudreṇa saṃsṛjet

1.52

क्षौद्रप्रमाणं स्नेहार्धं तत्सर्वं घृतभाजने

kṣaudrapramāṇaṃ snehārdhaṃ tatsarvaṃ ghṛtabhājane

Carakasaṃhitā