4.91

अभ्यङ्गयोगाः परिषेचनानि सेकावगाहाः शयनानि वेश्म

abhyaṅgayogāḥ pariṣecanāni sekāvagāhāḥ śayanāni veśma

4.91.2

शीतो विधिर्बस्तिविधानमग्र्यं पित्तज्वरे यत् प्रशमाय दिष्टम्

śīto vidhirbastividhānamagryaṃ pittajvare yat praśamāya diṣṭam

4.92

तद्रक्तपित्ते निखिलेन कार्यं कालं च मात्रां च पुरा समीक्ष्य

tadraktapitte nikhilena kāryaṃ kālaṃ ca mātrāṃ ca purā samīkṣya

4.92.2

सर्पिर्गुडा ये च हिताः क्षतेभ्यस्ते रक्तपित्तं शमयन्ति सद्यः

sarpirguḍā ye ca hitāḥ kṣatebhyaste raktapittaṃ śamayanti sadyaḥ

4.93

कफानुबन्धे रुधिरे सपित्ते कण्ठागते स्याद्ग्रथिते प्रयोगः

kaphānubandhe rudhire sapitte kaṇṭhāgate syādgrathite prayogaḥ

4.93.2

युक्तस्य युक्त्या मधुसर्पिषोश्च क्षारस्य चैवोत्पलनालजस्य

yuktasya yuktyā madhusarpiṣośca kṣārasya caivotpalanālajasya

4.94

मृणालपद्मोत्पलकेशराणां तथा पलाशस्य तथा प्रियङ्गोः

mṛṇālapadmotpalakeśarāṇāṃ tathā palāśasya tathā priyaṅgoḥ

4.94.2

तथा मधूकस्य तथासनस्य क्षाराः प्रयोज्या विधिनैव तेन

tathā madhūkasya tathāsanasya kṣārāḥ prayojyā vidhinaiva tena

4.95

शतावरीदाडिमतिन्तिडीकं काकोलिमेदे मधुकं विदारीम्

śatāvarīdāḍimatintiḍīkaṃ kākolimede madhukaṃ vidārīm

4.95.2

पिष्ट्वा च मूलं फलपूरकस्य घृतं पचेत् क्षीरचतुर्गुणं ज्ञः

piṣṭvā ca mūlaṃ phalapūrakasya ghṛtaṃ pacet kṣīracaturguṇaṃ jñaḥ

4.96

कासज्वरानाहविबन्धशूलं तद्रक्तपित्तं च घृतं निहन्यात्

kāsajvarānāhavibandhaśūlaṃ tadraktapittaṃ ca ghṛtaṃ nihanyāt

4.96.2

यत् पञ्चमूलैरथ पञ्चभिर्वा सिद्धं घृतं तच्च तदर्थकारि

yat pañcamūlairatha pañcabhirvā siddhaṃ ghṛtaṃ tacca tadarthakāri

4.97

इति शतावर्यादिघृतम्

iti śatāvaryādighṛtam

4.97.2

कषाययोगा य इहोपदिष्टास्ते चावपीडे भिषजा प्रयोज्याः

kaṣāyayogā ya ihopadiṣṭāste cāvapīḍe bhiṣajā prayojyāḥ

4.97.3

घ्राणात् प्रवृत्तं रुधिरं सपीतं यदा भवेन्निःसृतदुष्टदोषम्

ghrāṇāt pravṛttaṃ rudhiraṃ sapītaṃ yadā bhavenniḥsṛtaduṣṭadoṣam

4.98

रक्ते प्रदुष्टे ह्यवपीडबन्धे दुष्टप्रतिश्यायशिरोविकाराः

rakte praduṣṭe hyavapīḍabandhe duṣṭapratiśyāyaśirovikārāḥ

4.98.2

रक्तं सपूयं कुणपश्च गन्धः स्याद् घ्राणनाशः कृमयश्च दुष्टाः

raktaṃ sapūyaṃ kuṇapaśca gandhaḥ syād ghrāṇanāśaḥ kṛmayaśca duṣṭāḥ

4.99

नीलोत्पलं गैरिकशङ्खयुक्तं सचन्दनं स्यात्तु सिताजलेन

nīlotpalaṃ gairikaśaṅkhayuktaṃ sacandanaṃ syāttu sitājalena

4.99.2

नस्यं तथाम्रास्थिरसः समङ्गा सधातकीमोचरसः सलोध्रः

nasyaṃ tathāmrāsthirasaḥ samaṅgā sadhātakīmocarasaḥ salodhraḥ

4.100

द्राक्षारसस्येक्षुरसस्य नस्यं क्षीरस्य दूर्वास्वरसस्य चैव

drākṣārasasyekṣurasasya nasyaṃ kṣīrasya dūrvāsvarasasya caiva

Carakasaṃhitā