2.1.50.2

वृषायते तेन परं मनुष्यस् तद्बृंहणं चैव बलप्रदं च

vṛṣāyate tena paraṃ manuṣyas tadbṛṃhaṇaṃ caiva balapradaṃ ca

2.1.51

तस्मात् पुरा शोधनमेव कार्यं बलानुरूपं न हि वृष्ययोगाः

tasmāt purā śodhanameva kāryaṃ balānurūpaṃ na hi vṛṣyayogāḥ

2.1.51.2

सिध्यन्ति देहे मलिने प्रयुक्ताः क्लिष्टे यथा वाससि रागयोगाः

sidhyanti dehe maline prayuktāḥ kliṣṭe yathā vāsasi rāgayogāḥ

2.1.52

वाजीकरणसामर्थ्यं क्षेत्रं स्त्री यस्य चैव या

vājīkaraṇasāmarthyaṃ kṣetraṃ strī yasya caiva yā

2.1.52.2

ये दोषा निरपत्यानां गुणाः पुत्रवतां च ये

ye doṣā nirapatyānāṃ guṇāḥ putravatāṃ ca ye

2.1.53

दश पञ्च च संयोगा वीर्यापत्यविवर्धनाः

daśa pañca ca saṃyogā vīryāpatyavivardhanāḥ

2.1.53.2

उक्तास्ते शरमूलीये पादे पुष्टिबलप्रदाः

uktāste śaramūlīye pāde puṣṭibalapradāḥ

2.1.54

इत्यग्निवेशकृते तन्त्रे चरकप्रतिसंस्कृते चिकित्सास्थाने वाजीकरणाध्याये संयोगशरमूलीयो नाम वाजीकरणपादः प्रथमः

ityagniveśakṛte tantre carakapratisaṃskṛte cikitsāsthāne vājīkaraṇādhyāye saṃyogaśaramūlīyo nāma vājīkaraṇapādaḥ prathamaḥ

2.2.1

अथात आसिक्तक्षीरिकं वाजीकरणपादं व्याख्यास्यामः

athāta āsiktakṣīrikaṃ vājīkaraṇapādaṃ vyākhyāsyāmaḥ

2.2.2

इति ह स्माह भगवानात्रेयः

iti ha smāha bhagavānātreyaḥ

2.2.3

आसिक्तक्षीरम् आपूर्णम् अशुष्कं शुद्धषष्टिकम्

āsiktakṣīram āpūrṇam aśuṣkaṃ śuddhaṣaṣṭikam

2.2.3.2

उदूखले समापोथ्य पीडयेत् क्षीरमर्दितम्

udūkhale samāpothya pīḍayet kṣīramarditam

2.2.4

गृहीत्वा तं रसं पूतं गव्येन पयसा सह

gṛhītvā taṃ rasaṃ pūtaṃ gavyena payasā saha

2.2.4.2

बीजानामात्मगुप्ताया धान्यमाषरसेन च

bījānāmātmaguptāyā dhānyamāṣarasena ca

2.2.5

बलायाः शूर्पपर्ण्याश्च जीवन्त्या जीवकस्य च

balāyāḥ śūrpaparṇyāśca jīvantyā jīvakasya ca

2.2.5.2

ऋद्ध्यर्षभककाकोलीश्वदंष्ट्रामधुकस्य च

ṛddhyarṣabhakakākolīśvadaṃṣṭrāmadhukasya ca

2.2.6

शतावर्या विदार्याश्च द्राक्षाखर्जूरयोर् अपि

śatāvaryā vidāryāśca drākṣākharjūrayor api

2.2.6.2

संयुक्तं मात्रया वैद्यः साधयेत्तत्र चावपेत्

saṃyuktaṃ mātrayā vaidyaḥ sādhayettatra cāvapet

2.2.7

तुगाक्षीर्याः समाषाणां शालीनां षष्टिकस्य च

tugākṣīryāḥ samāṣāṇāṃ śālīnāṃ ṣaṣṭikasya ca

2.2.7.2

गोधूमानां च चूर्णानि यैः स सान्द्रीभवेद्रसः

godhūmānāṃ ca cūrṇāni yaiḥ sa sāndrībhavedrasaḥ

Carakasaṃhitā