2.2.28

तप्ते सर्पिषि नक्राण्डं ताम्रचूडाण्डमिश्रितम्

tapte sarpiṣi nakrāṇḍaṃ tāmracūḍāṇḍamiśritam

2.2.28.2

युक्तं षष्टिकचूर्णेन सर्पिषाभिनवेन च

yuktaṃ ṣaṣṭikacūrṇena sarpiṣābhinavena ca

2.2.29

पक्त्वा पूपलिकाः खादेद्वारुणीमण्डपो नरः

paktvā pūpalikāḥ khādedvāruṇīmaṇḍapo naraḥ

2.2.29.2

य इच्छेदश्ववद् गन्तुं प्रसेक्तुं गजवच् च यः

ya icchedaśvavad gantuṃ prasektuṃ gajavac ca yaḥ

2.2.30

एतैः प्रयोगैर्विधिवद्वपुष्मान् वीर्योपपन्नो बलवर्णयुक्तः

etaiḥ prayogairvidhivadvapuṣmān vīryopapanno balavarṇayuktaḥ

2.2.30.2

हर्षान्वितो वाजिवद् अष्टवर्षो भवेत् समर्थश्च वराङ्गनासु

harṣānvito vājivad aṣṭavarṣo bhavet samarthaśca varāṅganāsu

2.2.31

यद्यच्च किंचिन् मनसः प्रियं स्याद्रम्या वनान्ताः पुलिनानि शैलाः

yadyacca kiṃcin manasaḥ priyaṃ syādramyā vanāntāḥ pulināni śailāḥ

2.2.31.2

इष्टाः स्त्रियो भूषणगन्धमाल्यं प्रिया वयस्याश्च तदत्र योग्यम्

iṣṭāḥ striyo bhūṣaṇagandhamālyaṃ priyā vayasyāśca tadatra yogyam

2.2.32

आसिक्तक्षीरिके पादे ये योगाः परिकीर्तिताः

āsiktakṣīrike pāde ye yogāḥ parikīrtitāḥ

2.2.32.2

अष्टाव् अपत्यकामैस्ते प्रयोज्याः पौरुषार्थिभिः

aṣṭāv apatyakāmaiste prayojyāḥ pauruṣārthibhiḥ

2.2.33

इत्यग्निवेशकृते तन्त्रे चरकप्रतिसंस्कृते चिकित्सास्थाने वाजीकरणाध्याये आसिक्तक्षीरिको नाम वाजीकरणपादो द्वितीयः

ityagniveśakṛte tantre carakapratisaṃskṛte cikitsāsthāne vājīkaraṇādhyāye āsiktakṣīriko nāma vājīkaraṇapādo dvitīyaḥ

2.3.1

अथातो माषपर्णभृतीयं वाजीकरणपादं व्याख्यास्यामः

athāto māṣaparṇabhṛtīyaṃ vājīkaraṇapādaṃ vyākhyāsyāmaḥ

2.3.2

इति ह स्माह भगवानात्रेयः

iti ha smāha bhagavānātreyaḥ

2.3.3

माषपर्णभृतां धेनुं गृष्टिं पुष्टां चतुःस्तनीम्

māṣaparṇabhṛtāṃ dhenuṃ gṛṣṭiṃ puṣṭāṃ catuḥstanīm

2.3.3.2

समानवर्णवत्सां च जीवद्वत्सां च बुद्धिमान्

samānavarṇavatsāṃ ca jīvadvatsāṃ ca buddhimān

2.3.4

रोहिणीमथवा कृष्णाम् ऊर्ध्वशृङ्गीम् अदारुणाम्

rohiṇīmathavā kṛṣṇām ūrdhvaśṛṅgīm adāruṇām

2.3.4.2

इक्ष्वादाम् अर्जुनादां वा सान्द्रक्षीरां च धारयेत्

ikṣvādām arjunādāṃ vā sāndrakṣīrāṃ ca dhārayet

2.3.5

केवलं तु पयस्तस्याः शृतं वाशृतमेव वा

kevalaṃ tu payastasyāḥ śṛtaṃ vāśṛtameva vā

2.3.5.2

शर्कराक्षौद्रसर्पिर्भिर्युक्तं तद्वृष्यमुत्तमम्

śarkarākṣaudrasarpirbhiryuktaṃ tadvṛṣyamuttamam

2.3.6

शुक्रलैर् जीवनीयैश्च बृंहणैर् बलवर्धनैः

śukralair jīvanīyaiśca bṛṃhaṇair balavardhanaiḥ

Carakasaṃhitā