2.4.46

रस इक्षौ यथा दध्नि सर्पिस्तैलं तिले यथा

rasa ikṣau yathā dadhni sarpistailaṃ tile yathā

2.4.46.2

सर्वत्रानुगतं देहे शुक्रं संस्पर्शने तथा

sarvatrānugataṃ dehe śukraṃ saṃsparśane tathā

2.4.47

तत् स्त्रीपुरुषसंयोगे चेष्टासंकल्पपीडनात्

tat strīpuruṣasaṃyoge ceṣṭāsaṃkalpapīḍanāt

2.4.47.2

शुक्रं प्रच्यवते स्थानाज्जलमार्द्रात्पटादिव

śukraṃ pracyavate sthānājjalamārdrātpaṭādiva

2.4.48

हर्षात्तर्षात् सरत्वाच्च पैच्छिल्याद् गौरवादपि

harṣāttarṣāt saratvācca paicchilyād gauravādapi

2.4.48.2

अणुप्रवणभावाच्च द्रुतत्वान् मारुतस्य च

aṇupravaṇabhāvācca drutatvān mārutasya ca

2.4.49

अष्टाभ्य एभ्यो हेतुभ्यः शुक्रं देहात् प्रसिच्यते

aṣṭābhya ebhyo hetubhyaḥ śukraṃ dehāt prasicyate

2.4.49.2

चरतो विश्वरूपस्य रूपद्रव्यं यदुच्यते

carato viśvarūpasya rūpadravyaṃ yaducyate

2.4.50

बहलं मधुरं स्निग्धम् अविस्रं गुरु पिच्छिलम्

bahalaṃ madhuraṃ snigdham avisraṃ guru picchilam

2.4.50.2

शुक्लं च यच्छुक्रं फलवत्तदसंशयम्

śuklaṃ ca yacchukraṃ phalavattadasaṃśayam

2.4.51

येन नारीषु सामर्थ्यं वाजीवल्लभते

yena nārīṣu sāmarthyaṃ vājīvallabhate

2.4.51.2

व्रजेच्चाभ्यधिकं येन वाजीकरणमेव तत्

vrajeccābhyadhikaṃ yena vājīkaraṇameva tat

2.4.52

हेतुर्योगोपदेशस्य योगा द्वादश चोत्तमाः

heturyogopadeśasya yogā dvādaśa cottamāḥ

2.4.52.2

यत् पूर्वं मैथुनात् सेव्यं सेव्यं यन्मैथुनाद् अनु

yat pūrvaṃ maithunāt sevyaṃ sevyaṃ yanmaithunād anu

2.4.53

यदा न सेव्याः प्रमदाः कृत्स्नः शुक्रविनिश्चयः

yadā na sevyāḥ pramadāḥ kṛtsnaḥ śukraviniścayaḥ

2.4.53.2

निरुक्तं चेह निर्दिष्टं पुमाञ्जातबलादिके

niruktaṃ ceha nirdiṣṭaṃ pumāñjātabalādike

2.4.54

इत्यग्निवेशकृते तन्त्रे चरकप्रतिसंस्कृते चिकित्सास्थाने वाजीकरणाध्याये पुमाञ्जातबलादिको नाम वाजीकरणपादश्चतुर्थः

ityagniveśakṛte tantre carakapratisaṃskṛte cikitsāsthāne vājīkaraṇādhyāye pumāñjātabalādiko nāma vājīkaraṇapādaścaturthaḥ

2.4.55

समाप्तश्चायं द्वितीयो वाजीकरणाध्यायः

samāptaścāyaṃ dvitīyo vājīkaraṇādhyāyaḥ

Carakasaṃhitā