1.100.15.2

कृतस्वस्त्ययनं चैव प्रार्थयेदम्बिकां सतीम्

kṛtasvastyayanaṃ caiva prārthayedambikāṃ satīm

1.100.16

रूपं देहि यशो देहि भगं भगवति देहि मे

rūpaṃ dehi yaśo dehi bhagaṃ bhagavati dehi me

1.100.16.2

पुत्रान्देहि श्रियं देहि सर्वान्कामांश्च देहि मे

putrāndehi śriyaṃ dehi sarvānkāmāṃśca dehi me

1.100.17

ब्राह्मणान् भोजयेत्पश्चाच्छुक्लवस्त्रानुलेपनैः

brāhmaṇān bhojayetpaścācchuklavastrānulepanaiḥ

1.100.17.2

वस्त्रयुग्मं गुरोर् दद्यात्सम्पूज्य च ग्रहांस्तथा

vastrayugmaṃ guror dadyātsampūjya ca grahāṃstathā

1.100.17.3

श्रेयः कर्मफलं विन्द्यात्सूर्यार्चनरतस्तथा

śreyaḥ karmaphalaṃ vindyātsūryārcanaratastathā

1.100.18

इति श्रीगारुडे महापुराणे पूर्वखण्डे प्रथमांशाख्ये आचारकाण्डे याज्ञवल्क्योक्तगणपतिकल्पनिरूपणं नाम शततमो ऽध्यायः

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe yājñavalkyoktagaṇapatikalpanirūpaṇaṃ nāma śatatamo 'dhyāyaḥ

1.101.1

याज्ञवल्क्य उवाच

yājñavalkya uvāca

1.101.1.2

श्रीकामः शान्तिकामो वा ग्रहदृष्ट्यभिचारवान्

śrīkāmaḥ śāntikāmo vā grahadṛṣṭyabhicāravān

1.101.1.3

ग्रहयज्ञं समं कुर्याद् ग्रहाश्चैते बुधैः स्मृताः

grahayajñaṃ samaṃ kuryād grahāścaite budhaiḥ smṛtāḥ

1.101.2

सूर्यः सोमो मङ्गलश्च बुधश्चैव बृहस्पतिः

sūryaḥ somo maṅgalaśca budhaścaiva bṛhaspatiḥ

1.101.2.2

शुक्रः शनैश्चरो राहुः केतुर्ग्रहगणाः स्मृताः

śukraḥ śanaiścaro rāhuḥ keturgrahagaṇāḥ smṛtāḥ

1.101.3

ताम्रकात्स्फाटिकाद्रक्तचन्दनात्स्वर्णकादुभौ

tāmrakātsphāṭikādraktacandanātsvarṇakādubhau

1.101.3.2

रजतादयसः सीसात्कांस्याद्वर्णान्निबोधत

rajatādayasaḥ sīsātkāṃsyādvarṇānnibodhata

1.101.4

रक्तः शुक्लस्तथा रक्तः पीतः पीतः सितोऽसितः

raktaḥ śuklastathā raktaḥ pītaḥ pītaḥ sito'sitaḥ

1.101.4.2

कृष्णः कृष्णः क्रमाद्वर्णा द्रव्याणि मुनयस्ततः

kṛṣṇaḥ kṛṣṇaḥ kramādvarṇā dravyāṇi munayastataḥ

1.101.5

स्थापयेद् ग्रहवर्णानि होमार्थं प्रलिखेत्पटे

sthāpayed grahavarṇāni homārthaṃ pralikhetpaṭe

1.101.5.2

स्नापयेद्धोमयेच्चैव ग्रहद्रव्यैर्विधानतः

snāpayeddhomayeccaiva grahadravyairvidhānataḥ

1.101.5.3

सुवर्णानि प्रदेयानि वासांसि सुसुमानि च

suvarṇāni pradeyāni vāsāṃsi susumāni ca

1.101.6

गन्धाश्च बलयश्चैव धूपो देयश्चगुग्गुलुः

gandhāśca balayaścaiva dhūpo deyaścagugguluḥ

Garuḍapurāṇa