1.107.37.2

हंससारसक्रौञ्चानां चक्रवाकं च कुक्कुटम्

haṃsasārasakrauñcānāṃ cakravākaṃ ca kukkuṭam

1.107.38

मयूरमेषघाती च अहोरात्रेण शुध्यति

mayūrameṣaghātī ca ahorātreṇa śudhyati

1.107.38.2

पक्षिणः सकलान्हत्वा अहोरात्रेण शुध्यति

pakṣiṇaḥ sakalānhatvā ahorātreṇa śudhyati

1.107.39

सर्वांश्चतुष्पदान्हत्वा अहोरात्रोषितो जपेत्

sarvāṃścatuṣpadānhatvā ahorātroṣito japet

1.107.39.2

शूद्रं हत्वा चरेत्कृच्छ्रमतिकृच्छ्रं तु वैश्यहा

śūdraṃ hatvā caretkṛcchramatikṛcchraṃ tu vaiśyahā

1.107.39.3

क्षत्रं चान्द्रायणं विप्रं द्वाविंशात्रिंशम् आहरेत्

kṣatraṃ cāndrāyaṇaṃ vipraṃ dvāviṃśātriṃśam āharet

1.107.40

इति श्रीगारुडे महापुराणे पूर्वखण्डे प्रथमांशाख्ये आचारकाण्डे पराशरोक्तधर्मनिरूपणं नाम सप्तोत्तरशततमो ऽध्यायः

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe parāśaroktadharmanirūpaṇaṃ nāma saptottaraśatatamo 'dhyāyaḥ

1.108.1

सूत उवाच

sūta uvāca

1.108.1.2

नीतिसारं प्रवक्ष्यामि अर्थशास्त्रादिसंश्रितम्

nītisāraṃ pravakṣyāmi arthaśāstrādisaṃśritam

1.108.1.3

राजादिभ्यो हितं पुण्यमायुः स्वर्गादिदायकम्

rājādibhyo hitaṃ puṇyamāyuḥ svargādidāyakam

1.108.2

सद्भिः सङ्गं प्रकुर्वीत सिद्धिकामः सदा नरः

sadbhiḥ saṅgaṃ prakurvīta siddhikāmaḥ sadā naraḥ

1.108.2.2

नासद्भिरिहलोकाय परलोकाय वा हितम्

nāsadbhirihalokāya paralokāya vā hitam

1.108.3

वर्जयेत्क्षुद्रसंवादमदुष्टस्य तु दर्शनम्

varjayetkṣudrasaṃvādamaduṣṭasya tu darśanam

1.108.3.2

विरोधं सह मित्रेण संप्रीतिं शत्रुसेविना

virodhaṃ saha mitreṇa saṃprītiṃ śatrusevinā

1.108.4

मूर्खशिष्योपदेशेन दुष्टस्त्रीभरणेन च

mūrkhaśiṣyopadeśena duṣṭastrībharaṇena ca

1.108.4.2

दुष्टानां संप्रयोगेण पण्डितो ऽप्यवसीदति

duṣṭānāṃ saṃprayogeṇa paṇḍito 'pyavasīdati

1.108.5

ब्राह्मणं बालिशं क्षत्रम् अयोद्धारं विशं जडम्

brāhmaṇaṃ bāliśaṃ kṣatram ayoddhāraṃ viśaṃ jaḍam

1.108.5.2

शूद्रमक्षरसंयुक्तं दूरतः परिवर्जयेत्

śūdramakṣarasaṃyuktaṃ dūrataḥ parivarjayet

1.108.6

कालेन रिपुणा सन्धिः काले मित्रेण विग्रहः

kālena ripuṇā sandhiḥ kāle mitreṇa vigrahaḥ

1.108.6.2

कार्यकारणमाश्रित्य कालं क्षिपति पण्डितः

kāryakāraṇamāśritya kālaṃ kṣipati paṇḍitaḥ

Garuḍapurāṇa