1.155.28.2

गुरुभिस्तिमितैरङ्गे राजधर्मावबन्धान्

gurubhistimitairaṅge rājadharmāvabandhān

1.155.29

सर्वाकृतिस् त्रिभिर् दोषैर् अपस्मार इवापरः

sarvākṛtis tribhir doṣair apasmāra ivāparaḥ

1.155.29.2

पातयत्याशु निश्चेष्टं विना बीभत्सचेष्टितैः

pātayatyāśu niśceṣṭaṃ vinā bībhatsaceṣṭitaiḥ

1.155.30

दोषैस्तु मदमूर्छायां कृतवेगेषु देहिनाम्

doṣaistu madamūrchāyāṃ kṛtavegeṣu dehinām

1.155.30.2

स्वयमेवोपशाम्यन्ति संन्यासेनौषधैर्

svayamevopaśāmyanti saṃnyāsenauṣadhair

1.155.31

वाग्देहमनसां चेष्टाम् आक्षिप्यातिबलाबलाः

vāgdehamanasāṃ ceṣṭām ākṣipyātibalābalāḥ

1.155.31.2

ससंन्यासं निपतिताः प्राणाघातनसंश्रयाः

sasaṃnyāsaṃ nipatitāḥ prāṇāghātanasaṃśrayāḥ

1.155.32

भवन्ति तेन पुरुषाः काष्ठभूता मृतोपमाः

bhavanti tena puruṣāḥ kāṣṭhabhūtā mṛtopamāḥ

1.155.32.2

म्रियेत शीघ्रं शीघ्रं चेच्चिकित्सा न प्रयुज्यते

mriyeta śīghraṃ śīghraṃ ceccikitsā na prayujyate

1.155.33

अगाधे ग्राहबहुले सलिलौघ इवार्णवे

agādhe grāhabahule salilaugha ivārṇave

1.155.33.2

संन्यासे विनिमज्जन्तं नरमाशु निवर्तयेत्

saṃnyāse vinimajjantaṃ naramāśu nivartayet

1.155.34

मदमानरोषतोषप्रवृत्तिभिर् इतस् ततः

madamānaroṣatoṣapravṛttibhir itas tataḥ

1.155.34.2

युक्तायुक्तं च समं युक्तिं युङ्क्ते न मद्येन

yuktāyuktaṃ ca samaṃ yuktiṃ yuṅkte na madyena

1.155.35

बलकासदेशपात्रं प्रकृतिसहतामथवा वयांसि

balakāsadeśapātraṃ prakṛtisahatāmathavā vayāṃsi

1.155.35.2

प्रविभञ्ज्यात् तनुरूपं पिबति ततः पिबत्यमृत

pravibhañjyāt tanurūpaṃ pibati tataḥ pibatyamṛta

1.155.36

इति श्रीगारुडे महापुराणे पूर्वखण्डे प्रथमांशाख्ये आचारकाण्डे मदात्ययादिनिदानं नाम पञ्चपञ्चाशदुत्तरशततमो ऽध्यायः

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe madātyayādinidānaṃ nāma pañcapañcāśaduttaraśatatamo 'dhyāyaḥ

1.156.1

धन्वन्तरिरुवाच

dhanvantariruvāca

1.156.1.2

अथार्शसां निदानं च व्याख्यास्यामि च सुश्रुत

athārśasāṃ nidānaṃ ca vyākhyāsyāmi ca suśruta

1.156.1.3

सर्वदा प्राणिनां मांसे कीलकाः प्रभवन्ति ये

sarvadā prāṇināṃ māṃse kīlakāḥ prabhavanti ye

1.156.2

अर्शांसि तस्मादुच्यन्ते गुदमार्गनिरोधनात्

arśāṃsi tasmāducyante gudamārganirodhanāt

Garuḍapurāṇa