2.6

स तु धर्मप्रसङ्गेन मेरोः पार्श्वे महागिरेः

sa tu dharmaprasaṅgena meroḥ pārśve mahāgireḥ

2.6.2

तृणबिन्द्वाश्रमं गत्वा न्यवसन्मुनिपुंगवः

tṛṇabindvāśramaṃ gatvā nyavasanmunipuṃgavaḥ

2.7

तपस्तेपे स धर्मात्मा स्वाध्यायनियतेन्द्रियः

tapastepe sa dharmātmā svādhyāyaniyatendriyaḥ

2.7.2

गत्वाश्रमपदं तस्य विघ्नं कुर्वन्ति कन्यकाः

gatvāśramapadaṃ tasya vighnaṃ kurvanti kanyakāḥ

2.8

देवपन्नगकन्याश्च राजर्षितनयाश्च याः

devapannagakanyāśca rājarṣitanayāśca yāḥ

2.8.2

क्रीडन्त्यो ऽप्सरसश्चैव तं देशम् उपपेदिरे

krīḍantyo 'psarasaścaiva taṃ deśam upapedire

2.9

सर्वर्तुषूपभोग्यत्वाद् रम्यत्वात् काननस्य च

sarvartuṣūpabhogyatvād ramyatvāt kānanasya ca

2.9.2

नित्यशस्तास्तु तं देशं गत्वा क्रीडन्ति कन्यकाः

nityaśastāstu taṃ deśaṃ gatvā krīḍanti kanyakāḥ

2.10

अथ रुष्टो महातेजा व्याजहार महामुनिः

atha ruṣṭo mahātejā vyājahāra mahāmuniḥ

2.10.2

या मे दर्शनम् आगच्छेत् सा गर्भं धारयिष्यति

yā me darśanam āgacchet sā garbhaṃ dhārayiṣyati

2.11

तास्तु सर्वाः प्रतिगताः श्रुत्वा वाक्यं महात्मनः

tāstu sarvāḥ pratigatāḥ śrutvā vākyaṃ mahātmanaḥ

2.11.2

ब्रह्मशापभयाद् भीतास्तं देशं नोपचक्रमुः

brahmaśāpabhayād bhītāstaṃ deśaṃ nopacakramuḥ

2.12

तृणबिन्दोस्तु राजर्षेस्तनया न शृणोति तत्

tṛṇabindostu rājarṣestanayā na śṛṇoti tat

2.12.2

गत्वाश्रमपदं तस्य विचचार सुनिर्भया

gatvāśramapadaṃ tasya vicacāra sunirbhayā

2.13

तस्मिन्न् एव तु काले स प्राजापत्यो महान् ऋषिः

tasminn eva tu kāle sa prājāpatyo mahān ṛṣiḥ

2.13.2

स्वाध्यायम् अकरोत् तत्र तपसा द्योतितप्रभः

svādhyāyam akarot tatra tapasā dyotitaprabhaḥ

2.14

सा तु वेदध्वनिं श्रुत्वा दृष्ट्वा चैव तपोधनम्

sā tu vedadhvaniṃ śrutvā dṛṣṭvā caiva tapodhanam

2.14.2

अभवत् पाण्डुदेहा सा सुव्यञ्जितशरीरजा

abhavat pāṇḍudehā sā suvyañjitaśarīrajā

2.15

दृष्ट्वा परमसंविग्ना सा तु तद्रूपम् आत्मनः

dṛṣṭvā paramasaṃvignā sā tu tadrūpam ātmanaḥ

2.15.2

इदं मे किं न्विति ज्ञात्वा पितुर् गत्वाग्रतः स्थिता

idaṃ me kiṃ nviti jñātvā pitur gatvāgrataḥ sthitā

Rāmāyaṇa