5.40.2

सुरान् सहेन्द्रान् ऋषिनागदानवान् बबाधिरे ते बलवीर्यदर्पिताः

surān sahendrān ṛṣināgadānavān babādhire te balavīryadarpitāḥ

5.41

जगद् भ्रमन्तो ऽनिलवद् दुरासदा रणे च मृत्युप्रतिमाः समाहिताः

jagad bhramanto 'nilavad durāsadā raṇe ca mṛtyupratimāḥ samāhitāḥ

5.41.2

वरप्रदानाद् अभिगर्विता भृशं क्रतुक्रियाणां प्रशमंकराः सदा

varapradānād abhigarvitā bhṛśaṃ kratukriyāṇāṃ praśamaṃkarāḥ sadā

6.1

तैर् वध्यमाना देवाश्च ऋषयश्च तपोधनाः

tair vadhyamānā devāśca ṛṣayaśca tapodhanāḥ

6.1.2

भयार्ताः शरणं जग्मुर् देवदेवं महेश्वरम्

bhayārtāḥ śaraṇaṃ jagmur devadevaṃ maheśvaram

6.2

ते समेत्य तु कामारिं त्रिपुरारिं त्रिलोचनम्

te sametya tu kāmāriṃ tripurāriṃ trilocanam

6.2.2

ऊचुः प्राञ्जलयो देवा भयगद्गदभाषिणः

ūcuḥ prāñjalayo devā bhayagadgadabhāṣiṇaḥ

6.3

सुकेशपुत्रैर् भगवन् पितामहवरोद्धतैः

sukeśaputrair bhagavan pitāmahavaroddhataiḥ

6.3.2

प्रजाध्यक्ष प्रजाः सर्वा बाध्यन्ते रिपुबाधन

prajādhyakṣa prajāḥ sarvā bādhyante ripubādhana

6.4

शरण्यान्यशरण्यानि आश्रमाणि कृतानि नः

śaraṇyānyaśaraṇyāni āśramāṇi kṛtāni naḥ

6.4.2

स्वर्गाच्च च्यावितः शक्रः स्वर्गे क्रीडन्ति शक्रवत्

svargācca cyāvitaḥ śakraḥ svarge krīḍanti śakravat

6.5

अहं विष्णुर् अहं रुद्रो ब्रह्माहं देवराड् अहम्

ahaṃ viṣṇur ahaṃ rudro brahmāhaṃ devarāḍ aham

6.5.2

अहं यमो ऽहं वरुणश्चन्द्रो ऽहं रविर् अप्यहम्

ahaṃ yamo 'haṃ varuṇaścandro 'haṃ ravir apyaham

6.6

इति ते राक्षसा देव वरदानेन दर्पिताः

iti te rākṣasā deva varadānena darpitāḥ

6.6.2

बाधन्ते समरोद्धर्षा ये च तेषां पुरःसराः

bādhante samaroddharṣā ye ca teṣāṃ puraḥsarāḥ

6.7

तन्नो देव भयार्तानाम् अभयं दातुम् अर्हसि

tanno deva bhayārtānām abhayaṃ dātum arhasi

6.7.2

अशिवं वपुर् आस्थाय जहि दैवतकण्टकान्

aśivaṃ vapur āsthāya jahi daivatakaṇṭakān

6.8

इत्युक्तस्तु सुरैः सर्वैः कपर्दी नीललोहितः

ityuktastu suraiḥ sarvaiḥ kapardī nīlalohitaḥ

6.8.2

सुकेशं प्रति सापेक्ष आह देवगणान् प्रभुः

sukeśaṃ prati sāpekṣa āha devagaṇān prabhuḥ

6.9

नाहं तान्निहनिष्यामि अवध्या मम ते ऽसुराः

nāhaṃ tānnihaniṣyāmi avadhyā mama te 'surāḥ

Rāmāyaṇa