72.1

अत्र यात्रां समीहन्तं शत्रुघ्नो लक्ष्मणानुजः

atra yātrāṃ samīhantaṃ śatrughno lakṣmaṇānujaḥ

72.1.2

भरतं शोकसंतप्तम् इदं वचनम् अब्रवीत्

bharataṃ śokasaṃtaptam idaṃ vacanam abravīt

72.2

गतिर् यः सर्वभूतानां दुःखे किं पुनर् आत्मनः

gatir yaḥ sarvabhūtānāṃ duḥkhe kiṃ punar ātmanaḥ

72.2.2

स रामः सत्त्वसम्पन्नः स्त्रिया प्रव्राजितो वनम्

sa rāmaḥ sattvasampannaḥ striyā pravrājito vanam

72.3

बलवान् वीर्यसम्पन्नो लक्ष्मणो नाम यो ऽप्य् असौ

balavān vīryasampanno lakṣmaṇo nāma yo 'py asau

72.3.2

किं न मोचयते रामं कृत्वापि पितृनिग्रहम्

kiṃ na mocayate rāmaṃ kṛtvāpi pitṛnigraham

72.4

पूर्वम् एव तु निग्राह्यः समवेक्ष्य नयानयौ

pūrvam eva tu nigrāhyaḥ samavekṣya nayānayau

72.4.2

उत्पथं यः समारूढो नार्या राजा वशं गतः

utpathaṃ yaḥ samārūḍho nāryā rājā vaśaṃ gataḥ

72.5

इति सम्भाषमाणे तु शत्रुघ्ने लक्ष्मणानुजे

iti sambhāṣamāṇe tu śatrughne lakṣmaṇānuje

72.5.2

प्राग्द्वारे ऽभूत् तदा कुब्जा सर्वाभरणभूषिता

prāgdvāre 'bhūt tadā kubjā sarvābharaṇabhūṣitā

72.6

लिप्ता चन्दनसारेण राजवस्त्राणि बिभ्रती

liptā candanasāreṇa rājavastrāṇi bibhratī

72.6.2

मेखलादामभिश् चित्रै रज्जुबद्धेव वानरी

mekhalādāmabhiś citrai rajjubaddheva vānarī

72.7

तां समीक्ष्य तदा द्वाःस्थो भृशं पापस्य कारिणीम्

tāṃ samīkṣya tadā dvāḥstho bhṛśaṃ pāpasya kāriṇīm

72.7.2

गृहीत्वाकरुणां कुब्जां शत्रुघ्नाय न्यवेदयत्

gṛhītvākaruṇāṃ kubjāṃ śatrughnāya nyavedayat

72.8

यस्याः कृते वने रामो न्यस्तदेहश् च वः पिता

yasyāḥ kṛte vane rāmo nyastadehaś ca vaḥ pitā

72.8.2

सेयं पापा नृशंसा च तस्याः कुरु यथामति

seyaṃ pāpā nṛśaṃsā ca tasyāḥ kuru yathāmati

72.9

शत्रुघ्नश् च तद् आज्ञाय वचनं भृशदुःखितः

śatrughnaś ca tad ājñāya vacanaṃ bhṛśaduḥkhitaḥ

72.9.2

अन्तःपुरचरान् सर्वान् इत्य् उवाच धृतव्रतः

antaḥpuracarān sarvān ity uvāca dhṛtavrataḥ

72.10

तीव्रम् उत्पादितं दुःखं भ्रातॄणां मे तथा पितुः

tīvram utpāditaṃ duḥkhaṃ bhrātṝṇāṃ me tathā pituḥ

72.10.2

यया सेयं नृशंसस्य कर्मणः फलम् अश्नुताम्

yayā seyaṃ nṛśaṃsasya karmaṇaḥ phalam aśnutām

Rāmāyaṇa