20.2

मया त्व् इदानीं शूरास् ते राक्षसा रुधिराशनाः

mayā tv idānīṃ śūrās te rākṣasā rudhirāśanāḥ

20.2.2

त्वत्प्रियार्थं विनिर्दिष्टाः किमर्थं रुद्यते पुनः

tvatpriyārthaṃ vinirdiṣṭāḥ kimarthaṃ rudyate punaḥ

20.3

भक्ताश् चैवानुरक्ताश् च हिताश् च मम नित्यशः

bhaktāś caivānuraktāś ca hitāś ca mama nityaśaḥ

20.3.2

घ्नन्तो ऽपि न निहन्तव्या न न कुर्युर् वचो मम

ghnanto 'pi na nihantavyā na na kuryur vaco mama

20.4

किम् एतच्छ्रोतुम् इच्छामि कारणं यत्कृते पुनः

kim etacchrotum icchāmi kāraṇaṃ yatkṛte punaḥ

20.4.2

हा नाथेति विनर्दन्ती सर्पवद् वेष्टसे क्षितौ

hā nātheti vinardantī sarpavad veṣṭase kṣitau

20.5

अनाथवद् विलपसि किं नु नाथे मयि स्थिते

anāthavad vilapasi kiṃ nu nāthe mayi sthite

20.5.2

उत्तिष्ठोत्तिष्ठ मा भैषीर् वैक्लव्यं त्यज्यताम् इह

uttiṣṭhottiṣṭha mā bhaiṣīr vaiklavyaṃ tyajyatām iha

20.6

इत्य् एवम् उक्ता दुर्धर्षा खरेण परिसान्त्विता

ity evam uktā durdharṣā khareṇa parisāntvitā

20.6.2

विमृज्य नयने सास्रे खरं भ्रातरम् अब्रवीत्

vimṛjya nayane sāsre kharaṃ bhrātaram abravīt

20.7

प्रेषिताश् च त्वया शूरा राक्षसास् ते चतुर्दश

preṣitāś ca tvayā śūrā rākṣasās te caturdaśa

20.7.2

निहन्तुं राघवं घोरा मत्प्रियार्थं सलक्ष्मणम्

nihantuṃ rāghavaṃ ghorā matpriyārthaṃ salakṣmaṇam

20.8

ते तु रामेण सामर्षाः शूलपट्टिशपाणयः

te tu rāmeṇa sāmarṣāḥ śūlapaṭṭiśapāṇayaḥ

20.8.2

समरे निहताः सर्वे सायकैर् मर्मभेदिभिः

samare nihatāḥ sarve sāyakair marmabhedibhiḥ

20.9

तान् भूमौ पतितान् दृष्ट्वा क्षणेनैव महाबलान्

tān bhūmau patitān dṛṣṭvā kṣaṇenaiva mahābalān

20.9.2

रामस्य च महत् कर्म महांस् त्रासो ऽभवन् मम

rāmasya ca mahat karma mahāṃs trāso 'bhavan mama

20.10

सास्मि भीता समुद्विग्ना विषण्णा च निशाचर

sāsmi bhītā samudvignā viṣaṇṇā ca niśācara

20.10.2

शरणं त्वां पुनः प्राप्ता सर्वतो भयदर्शिनी

śaraṇaṃ tvāṃ punaḥ prāptā sarvato bhayadarśinī

20.11

विषादनक्राध्युषिते परित्रासोर्मिमालिनि

viṣādanakrādhyuṣite paritrāsormimālini

20.11.2

किं मां न त्रायसे मग्नां विपुले शोकसागरे

kiṃ māṃ na trāyase magnāṃ vipule śokasāgare

Rāmāyaṇa