71.1

दिवं तु तस्यां यातायां शबर्यां स्वेन कर्मणा

divaṃ tu tasyāṃ yātāyāṃ śabaryāṃ svena karmaṇā

71.1.2

लक्ष्मणेन सह भ्रात्रा चिन्तयामास राघवः

lakṣmaṇena saha bhrātrā cintayāmāsa rāghavaḥ

71.2

चिन्तयित्वा तु धर्मात्मा प्रभावं तं महात्मनाम्

cintayitvā tu dharmātmā prabhāvaṃ taṃ mahātmanām

71.2.2

हितकारिणम् एकाग्रं लक्ष्मणं राघवो ऽब्रवीत्

hitakāriṇam ekāgraṃ lakṣmaṇaṃ rāghavo 'bravīt

71.3

दृष्टो ऽयम् आश्रमः सौम्य बह्वाश्चर्यः कृतात्मनाम्

dṛṣṭo 'yam āśramaḥ saumya bahvāścaryaḥ kṛtātmanām

71.3.2

विश्वस्तमृगशार्दूलो नानाविहगसेवितः

viśvastamṛgaśārdūlo nānāvihagasevitaḥ

71.4

सप्तानां च समुद्राणाम् एषु तीर्थेषु लक्ष्मण

saptānāṃ ca samudrāṇām eṣu tīrtheṣu lakṣmaṇa

71.4.2

उपस्पृष्टं च विधिवत् पितरश् चापि तर्पिताः

upaspṛṣṭaṃ ca vidhivat pitaraś cāpi tarpitāḥ

71.5

प्रनष्टम् अशुभं यत् तत् कल्याणं समुपस्थितम्

pranaṣṭam aśubhaṃ yat tat kalyāṇaṃ samupasthitam

71.5.2

तेन त्व् एतत् प्रहृष्टं मे मनो लक्ष्मण सम्प्रति

tena tv etat prahṛṣṭaṃ me mano lakṣmaṇa samprati

71.6

हृदये हि नरव्याघ्र शुभम् आविर्भविष्यति

hṛdaye hi naravyāghra śubham āvirbhaviṣyati

71.6.2

तद् आगच्छ गमिष्यावः पम्पां तां प्रियदर्शनाम्

tad āgaccha gamiṣyāvaḥ pampāṃ tāṃ priyadarśanām

71.7

ऋश्यमूको गिरिर् यत्र नातिदूरे प्रकाशते

ṛśyamūko girir yatra nātidūre prakāśate

71.7.2

यस्मिन् वसति धर्मात्मा सुग्रीवो ऽंशुमतः सुतः

yasmin vasati dharmātmā sugrīvo 'ṃśumataḥ sutaḥ

71.7.3

नित्यं वालिभयात् त्रस्तश् चतुर्भिः सह वानरैः

nityaṃ vālibhayāt trastaś caturbhiḥ saha vānaraiḥ

71.8

अभित्वरे च तं द्रष्टुं सुग्रीवं वानरर्षभम्

abhitvare ca taṃ draṣṭuṃ sugrīvaṃ vānararṣabham

71.8.2

तदधीनं हि मे सौम्य सीतायाः परिमार्गणम्

tadadhīnaṃ hi me saumya sītāyāḥ parimārgaṇam

71.9

इति ब्रुवाणं तं रामं सौमित्रिर् इदम् अब्रवीत्

iti bruvāṇaṃ taṃ rāmaṃ saumitrir idam abravīt

71.9.2

गच्छावस् त्वरितं तत्र ममापि त्वरते मनः

gacchāvas tvaritaṃ tatra mamāpi tvarate manaḥ

71.10

आश्रमात् तु ततस् तस्मान् निष्क्रम्य स विशां पतिः

āśramāt tu tatas tasmān niṣkramya sa viśāṃ patiḥ

Rāmāyaṇa