8.29.2

धारयामास धैर्येण सुग्रीवो रामसंनिधौ

dhārayāmāsa dhairyeṇa sugrīvo rāmasaṃnidhau

8.30

संनिगृह्य तु तं बाष्पं प्रमृज्य नयने शुभे

saṃnigṛhya tu taṃ bāṣpaṃ pramṛjya nayane śubhe

8.30.2

विनिःश्वस्य च तेजस्वी राघवं पुनर् अब्रवीत्

viniḥśvasya ca tejasvī rāghavaṃ punar abravīt

8.31

पुराहं वालिना राम राज्यात् स्वाद् अवरोपितः

purāhaṃ vālinā rāma rājyāt svād avaropitaḥ

8.31.2

परुषाणि च संश्राव्य निर्धूतो ऽस्मि बलीयसा

paruṣāṇi ca saṃśrāvya nirdhūto 'smi balīyasā

8.32

हृता भार्या च मे तेन प्राणेभ्यो ऽपि गरीयसी

hṛtā bhāryā ca me tena prāṇebhyo 'pi garīyasī

8.32.2

सुहृदश् च मदीया ये संयता बन्धनेषु ते

suhṛdaś ca madīyā ye saṃyatā bandhaneṣu te

8.33

यत्नवांश् च सुदुष्टात्मा मद्विनाशाय राघव

yatnavāṃś ca suduṣṭātmā madvināśāya rāghava

8.33.2

बहुशस् तत् प्रयुक्ताश् च वानरा निहता मया

bahuśas tat prayuktāś ca vānarā nihatā mayā

8.34

शङ्कया त्व् एतया चाहं दृष्ट्वा त्वाम् अपि राघव

śaṅkayā tv etayā cāhaṃ dṛṣṭvā tvām api rāghava

8.34.2

नोपसर्पाम्य् अहं भीतो भये सर्वे हि बिभ्यति

nopasarpāmy ahaṃ bhīto bhaye sarve hi bibhyati

8.35

केवलं हि सहाया मे हनुमत्प्रमुखास् त्व् इमे

kevalaṃ hi sahāyā me hanumatpramukhās tv ime

8.35.2

अतो ऽहं धारयाम्य् अद्य प्राणान् कृच्छ्रगतो ऽपि सन्

ato 'haṃ dhārayāmy adya prāṇān kṛcchragato 'pi san

8.36

एते हि कपयः स्निग्धा मां रक्षन्ति समन्ततः

ete hi kapayaḥ snigdhā māṃ rakṣanti samantataḥ

8.36.2

सह गच्छन्ति गन्तव्ये नित्यं तिष्ठन्ति च स्थिते

saha gacchanti gantavye nityaṃ tiṣṭhanti ca sthite

8.37

संक्षेपस् त्व् एष मे राम किम् उक्त्वा विस्तरं हि ते

saṃkṣepas tv eṣa me rāma kim uktvā vistaraṃ hi te

8.37.2

स मे ज्येष्ठो रिपुर् भ्राता वाली विश्रुतपौरुषः

sa me jyeṣṭho ripur bhrātā vālī viśrutapauruṣaḥ

8.38

तद्विनाशाद्धि मे दुःखं प्रनष्टं स्याद् अनन्तरम्

tadvināśāddhi me duḥkhaṃ pranaṣṭaṃ syād anantaram

8.38.2

सुखं मे जीवितं चैव तद्विनाशनिबन्धनम्

sukhaṃ me jīvitaṃ caiva tadvināśanibandhanam

8.39

एष मे राम शोकान्तः शोकार्तेन निवेदितः

eṣa me rāma śokāntaḥ śokārtena niveditaḥ

Rāmāyaṇa