9.4.2

तेन तस्य महद् वैरं स्त्रीकृतं विश्रुतं पुरा

tena tasya mahad vairaṃ strīkṛtaṃ viśrutaṃ purā

9.5

स तु सुप्ते जने रात्रौ किष्किन्धाद् वारम् आगतः

sa tu supte jane rātrau kiṣkindhād vāram āgataḥ

9.5.2

नर्दति स्म सुसंरब्धो वालिनं चाह्वयद् रणे

nardati sma susaṃrabdho vālinaṃ cāhvayad raṇe

9.6

प्रसुप्तस् तु मम भ्राता नर्दितं भैरवस्वनम्

prasuptas tu mama bhrātā narditaṃ bhairavasvanam

9.6.2

श्रुत्वा न ममृषे वाली निष्पपात जवात् तदा

śrutvā na mamṛṣe vālī niṣpapāta javāt tadā

9.7

स तु वै निःसृतः क्रोधात् तं हन्तुम् असुरोत्तमम्

sa tu vai niḥsṛtaḥ krodhāt taṃ hantum asurottamam

9.7.2

वार्यमाणस् ततः स्त्रीभिर् मया च प्रणतात्मना

vāryamāṇas tataḥ strībhir mayā ca praṇatātmanā

9.8

स तु निर्धूय सर्वान्नो निर्जगाम महाबलः

sa tu nirdhūya sarvānno nirjagāma mahābalaḥ

9.8.2

ततो ऽहम् अपि सौहार्दान् निःसृतो वालिना सह

tato 'ham api sauhārdān niḥsṛto vālinā saha

9.9

स तु मे भ्रातरं दृष्ट्वा मां च दूराद् अवस्थितम्

sa tu me bhrātaraṃ dṛṣṭvā māṃ ca dūrād avasthitam

9.9.2

असुरो जातसंत्रासः प्रदुद्राव तदा भृशम्

asuro jātasaṃtrāsaḥ pradudrāva tadā bhṛśam

9.10

तस्मिन् द्रवति संत्रस्ते ह्य् आवां द्रुततरं गतौ

tasmin dravati saṃtraste hy āvāṃ drutataraṃ gatau

9.10.2

प्रकाशो ऽपि कृतो मार्गश् चन्द्रेणोद्गच्छता तदा

prakāśo 'pi kṛto mārgaś candreṇodgacchatā tadā

9.11

स तृणैर् आवृतं दुर्गं धरण्या विवरं महत्

sa tṛṇair āvṛtaṃ durgaṃ dharaṇyā vivaraṃ mahat

9.11.2

प्रविवेशासुरो वेगाद् आवाम् आसाद्य विष्ठितौ

praviveśāsuro vegād āvām āsādya viṣṭhitau

9.12

तं प्रविष्टं रिपुं दृष्ट्वा बिलं रोषवशं गतः

taṃ praviṣṭaṃ ripuṃ dṛṣṭvā bilaṃ roṣavaśaṃ gataḥ

9.12.2

माम् उवाच तदा वाली वचनं क्षुभितेन्द्रियः

mām uvāca tadā vālī vacanaṃ kṣubhitendriyaḥ

9.13

इह त्वं तिष्ठ सुग्रीव बिलद्वारि समाहितः

iha tvaṃ tiṣṭha sugrīva biladvāri samāhitaḥ

9.13.2

यावद् अत्र प्रविश्याहं निहन्मि समरे रिपुम्

yāvad atra praviśyāhaṃ nihanmi samare ripum

9.14

मया त्व् एतद् वचः श्रुत्वा याचितः स परंतप

mayā tv etad vacaḥ śrutvā yācitaḥ sa paraṃtapa

Rāmāyaṇa