3.33.2

तीक्ष्णशूलधरांश्चैव वज्रिणश्च महाबलान्

tīkṣṇaśūladharāṃścaiva vajriṇaśca mahābalān

3.34

शतसाहस्रम् अव्यग्रम् आरक्षं मध्यमं कपिः

śatasāhasram avyagram ārakṣaṃ madhyamaṃ kapiḥ

3.34.2

प्राकारावृतम् अत्यन्तं ददर्श स महाकपिः

prākārāvṛtam atyantaṃ dadarśa sa mahākapiḥ

3.35

त्रिविष्टपनिभं दिव्यं दिव्यनादविनादितम्

triviṣṭapanibhaṃ divyaṃ divyanādavināditam

3.35.2

वाजिहेषितसंघुष्टं नादितं भूषणैस्तथा

vājiheṣitasaṃghuṣṭaṃ nāditaṃ bhūṣaṇaistathā

3.36

रथैर् यानैर् विमानैश्च तथा गजहयैः शुभैः

rathair yānair vimānaiśca tathā gajahayaiḥ śubhaiḥ

3.36.2

वारणैश्च चतुर्दन्तैः श्वेताभ्रनिचयोपमैः

vāraṇaiśca caturdantaiḥ śvetābhranicayopamaiḥ

3.37

भूषितं रुचिरद्वारं मत्तैश्च मृगपक्षिभिः

bhūṣitaṃ ruciradvāraṃ mattaiśca mṛgapakṣibhiḥ

3.37.2

राक्षसाधिपतेर् गुप्तम् आविवेश गृहं कपिः

rākṣasādhipater guptam āviveśa gṛhaṃ kapiḥ

4.1

ततः स मध्यं गतम् अंशुमन्तं ज्योत्स्नावितानं महद् उद्वमन्तम्

tataḥ sa madhyaṃ gatam aṃśumantaṃ jyotsnāvitānaṃ mahad udvamantam

4.1.2

ददर्श धीमान् दिवि भानुमन्तं गोष्ठे वृषं मत्तम् इव भ्रमन्तम्

dadarśa dhīmān divi bhānumantaṃ goṣṭhe vṛṣaṃ mattam iva bhramantam

4.2

लोकस्य पापानि विनाशयन्तं महोदधिं चापि समेधयन्तम्

lokasya pāpāni vināśayantaṃ mahodadhiṃ cāpi samedhayantam

4.2.2

भूतानि सर्वाणि विराजयन्तं ददर्श शीतांशुम् अथाभियान्तम्

bhūtāni sarvāṇi virājayantaṃ dadarśa śītāṃśum athābhiyāntam

4.3

या भाति लक्ष्मीर् भुवि मन्दरस्था तथा प्रदोषेषु च सागरस्था

yā bhāti lakṣmīr bhuvi mandarasthā tathā pradoṣeṣu ca sāgarasthā

4.3.2

तथैव तोयेषु च पुष्करस्था रराज सा चारुनिशाकरस्था

tathaiva toyeṣu ca puṣkarasthā rarāja sā cāruniśākarasthā

4.4

हंसो यथा राजतपञ्जरस्थः सिंहो यथा मन्दरकन्दरस्थः

haṃso yathā rājatapañjarasthaḥ siṃho yathā mandarakandarasthaḥ

4.4.2

वीरो यथा गर्वितकुञ्जरस्थश् चन्द्रो ऽपि बभ्राज तथाम्बरस्थः

vīro yathā garvitakuñjarasthaś candro 'pi babhrāja tathāmbarasthaḥ

4.5

स्थितः ककुद्मान् इव तीक्ष्णशृङ्गो महाचलः श्वेत इवोच्चशृङ्गः

sthitaḥ kakudmān iva tīkṣṇaśṛṅgo mahācalaḥ śveta ivoccaśṛṅgaḥ

4.5.2

हस्तीव जाम्बूनदबद्धशृङ्गो विभाति चन्द्रः परिपूर्णशृङ्गः

hastīva jāmbūnadabaddhaśṛṅgo vibhāti candraḥ paripūrṇaśṛṅgaḥ

4.6

प्रकाशचन्द्रोदयनष्टदोषः प्रवृद्धरक्षःपिशिताशदोषः

prakāśacandrodayanaṣṭadoṣaḥ pravṛddharakṣaḥpiśitāśadoṣaḥ

Rāmāyaṇa