4.6.2

रामाभिरामेरितचित्तदोषः स्वर्गप्रकाशो भगवान् प्रदोषः

rāmābhirāmeritacittadoṣaḥ svargaprakāśo bhagavān pradoṣaḥ

4.7

तन्त्रीस्वनाः कर्णसुखाः प्रवृत्ताः स्वपन्ति नार्यः पतिभिः सुवृत्ताः

tantrīsvanāḥ karṇasukhāḥ pravṛttāḥ svapanti nāryaḥ patibhiḥ suvṛttāḥ

4.7.2

नक्तंचराश्चापि तथा प्रवृत्ता विहर्तुम् अत्यद्भुतरौद्रवृत्ताः

naktaṃcarāścāpi tathā pravṛttā vihartum atyadbhutaraudravṛttāḥ

4.8

मत्तप्रमत्तानि समाकुलानि रथाश्वभद्रासनसंकुलानि

mattapramattāni samākulāni rathāśvabhadrāsanasaṃkulāni

4.8.2

वीरश्रिया चापि समाकुलानि ददर्श धीमान् स कपिः कुलानि

vīraśriyā cāpi samākulāni dadarśa dhīmān sa kapiḥ kulāni

4.9

परस्परं चाधिकम् आक्षिपन्ति भुजांश्च पीनान् अधिविक्षिपन्ति

parasparaṃ cādhikam ākṣipanti bhujāṃśca pīnān adhivikṣipanti

4.9.2

मत्तप्रलापान् अधिविक्षिपन्ति मत्तानि चान्योन्यम् अधिक्षिपन्ति

mattapralāpān adhivikṣipanti mattāni cānyonyam adhikṣipanti

4.10

रक्षांसि वक्षांसि च विक्षिपन्ति गात्राणि कान्तासु च विक्षिपन्ति

rakṣāṃsi vakṣāṃsi ca vikṣipanti gātrāṇi kāntāsu ca vikṣipanti

4.10.2

ददर्श कान्ताश्च समालपन्ति तथापरास्तत्र पुनः स्वपन्ति

dadarśa kāntāśca samālapanti tathāparāstatra punaḥ svapanti

4.11

महागजैश् चापि तथा नदद्भिः सुपूजितैश् चापि तथा सुसद्भिः

mahāgajaiś cāpi tathā nadadbhiḥ supūjitaiś cāpi tathā susadbhiḥ

4.11.2

रराज वीरैश्च विनिःश्वसद्भिर् ह्रदो भुजङ्गैर् इव निःश्वसद्भिः

rarāja vīraiśca viniḥśvasadbhir hrado bhujaṅgair iva niḥśvasadbhiḥ

4.12

बुद्धिप्रधानान् रुचिराभिधानान् संश्रद्दधानाञ् जगतः प्रधानान्

buddhipradhānān rucirābhidhānān saṃśraddadhānāñ jagataḥ pradhānān

4.12.2

नानाविधानान् रुचिराभिधानान् ददर्श तस्यां पुरि यातुधानान्

nānāvidhānān rucirābhidhānān dadarśa tasyāṃ puri yātudhānān

4.13

ननन्द दृष्ट्वा स च तान् सुरूपान् नानागुणान् आत्मगुणानुरूपान्

nananda dṛṣṭvā sa ca tān surūpān nānāguṇān ātmaguṇānurūpān

4.13.2

विद्योतमानान् स च तान् सुरूपान् ददर्श कांश्चिच् च पुनर् विरूपान्

vidyotamānān sa ca tān surūpān dadarśa kāṃścic ca punar virūpān

4.14

ततो वरार्हाः सुविशुद्धभावास् तेषां स्त्रियस्तत्र महानुभावाः

tato varārhāḥ suviśuddhabhāvās teṣāṃ striyastatra mahānubhāvāḥ

4.14.2

प्रियेषु पानेषु च सक्तभावा ददर्श तारा इव सुप्रभावाः

priyeṣu pāneṣu ca saktabhāvā dadarśa tārā iva suprabhāvāḥ

4.15

श्रिया ज्वलन्तीस्त्रपयोपगूढा निशीथकाले रमणोपगूढाः

śriyā jvalantīstrapayopagūḍhā niśīthakāle ramaṇopagūḍhāḥ

4.15.2

ददर्श काश्चित् प्रमदोपगूढा यथा विहंगाः कुसुमोपगूढाः

dadarśa kāścit pramadopagūḍhā yathā vihaṃgāḥ kusumopagūḍhāḥ

4.16

अन्याः पुनर् हर्म्यतलोपविष्टास् तत्र प्रियाङ्केषु सुखोपविष्टाः

anyāḥ punar harmyatalopaviṣṭās tatra priyāṅkeṣu sukhopaviṣṭāḥ

Rāmāyaṇa